10 di Dicembar DUCJ i DIRITS UMANS par DUTIS lis PERSONIS

10 di Dicembar

DUCJ i DIRITS UMANS par DUTIS lis PERSONIS

 

La Declarazion universâl dai dirits umans e je stade firmade a Parîs ai 10 di Dicembar dal 1948.

Cun cheste Cjarte, pe prime volte inte storie moderne, si stabilis la universalitât di chescj dirits, no dome par cualchidun in cualchi paîs, ma par dute le int di ducj i popui di dut il mont, e basâts suntun concet di dignitât umane intrinsecahe, inalienabile, e universal.

 

La Declarazion e ricognòs il dirit ae vite, ae libertât e ae sigurece personâl; al ricognossiment tant che persone e ae avualance devant de leç; a garanziis specifichis intal procès penâl; ae libertât di moviment e di emigrazion; al asîl; ae nazionalitât; ae proprietât; ae libertât di pinsîr, di cussience e di religjon; ae libertât di associazion, di opinion e di espression; ae sigurece sociâl; a lavorâ in cundizions justis e favorevulis e ae libertât sindacâl; a un nivel adat di vite e di educazion.

 

Pes Nazions Unidis il dirit ae vite, il dirit ae libertât de sclavitût, il dirit ae libertât de torture a son Dirits Umans che no puedin mai vignî a mancjâ par nissun in nissun puest.

I Stâts dal Consei di Europe a àn fat un altri pas indenant traviers une convenzion pe difese dai dirits dal om e des libertâts fondamentâls, firmade a Rome tal 1950 e jentrade in vore intal 1953.

Cheste convenzion europeane e fisse che il gjoldiment dai dirits umans nol è subiet a nissune discriminazion fondade su resons di raze, lenghe, religjon, opinion publiche, origjin nazionâl o sociâl.  

Informazioni aggiuntive